Category: отношения

Category was added automatically. Read all entries about "отношения".

чи

Кулят 6-це Финнэнь-Угрань Раськеютконь Инекужосто.

"Шумбрат уледе, ялгат! Шумбрат уледе, оят!
Мадьяронь мастор. Шиофок ошось. Самай тесэ, сэтьме чокшне шкане, мон озынь столь экшс ды ушодынь пурнамо вейс ды путомо конёвс меельце читнеде арсематнень. Читнеде, конатнестэ минь Эрюш марто ванынек, ве ёндо, ды потстояк, кода ютавтсть МККФУНонь Котоце Инекужонть (Конгрессэнть).
Ушосто марязевсь «Не плачь девчёнка» морось. А содан, моры те «мордовской» делегациясь, эли кодамояк лията Россиянь раськетнесэ кучозь? Нама, весе сизесть важодезь, ды ней оймсить «по нашему».
Пачкодинек минь, Эрюш Вежай марто, те мадьяронь ошонтень аволь шождасто. Сынек пиже веть, котоце таштамковонь (сентябрь) чистэнть. Сатсть превенек лоткамс «Азур» отэлентень. Самай тесэ ютавтови инекужось. Седе тов те миненек пек лездась.
Важодема чинь ушодомантень кенеринек оймсеме, шлямо –нарамо. Оршинек шождат кизэнь панарнэть (футболкат), конат ульнесть артозь эрзянь коцткесэ ды «Мон эрзя» сёрмадовкссонть. Теске, колмо тюссо цитнезь, кенярдовтсь сельме ды эждясь седей, эрзянь кшнинь тешкскесь.
Васенце минек тёкшмелесь ульнесь васстовомс комитетэнь прявтонть марто. Ульнесть кевкстеманок сонзэ туртов. Васенцесь, вана мезде! Эйзюрковсто сонензэ ульнесть кучозь эрзянь делегатнэнь лемрисьмесь (список имён). Делегатнэ ульнесть кочказь истя, кода ёвтазь Комитетэнть конёвтнэсэ, валрисьмесь ульнесть кемекстазь Эрзянь Инекужонь Топавтома Куросонть. Секс, ильтямсто, Инязорось кармавтокшнось кевкстемс: -мекс арасель кодамояк венькс (ответ) эрзятнень пельде кучозь сёрматнень ды гайнематнень лангс? Те кевкстемасонть минь «кенярдовтынек» Марков Валерий Петровичень сеске шумбракстнемадо мееле.
Валонок панжомась минек абунгавтымизь! Келя, -«комитетэсь «принципиально» мезеяк эзь веньксте миненек, тень таркас сон ёвтась минек сёрматнеде «мордовской делегациянтень». Секс (?!), азёдо ды кортадо «мордовской делегациянть» марто эсенк делегатонь статустонть»!!! Нама, ней чарькодевсь, , мейсь минек эрзянь делегациясь кадовсь Конгрессэв тердемавтомо ды кинень сюконямс тень кис.
Нама, зярдо, минек малав мольсь Тултаев, таколинь мордовской культурань министрась, кенярдомат мельсэнек эзть кепетеве. Цинизмачись, паряк, течинь кирдивиенть юронь коесь. Мизолдазь венти миненек кедь! -Ваша, арсезевинь! Вейкесь сетнеде, конат эзизь нолда эрзянь делегациянть Инекужос –венти тень кедь, теке паро ялга! Арась! Зняро вийть ульнесть путозь тев молемантень аволь истямо кедень лепштямонь кис. –«Вот так значит?», кежень пачк кевкстсь таколинь министрась. - Вана истя, панжия мон валозо. Истя ульнесь вастозь «Безаев ялгаськак», конань валонзо кувалт «мордвань» делегациясь ульнесь кемекстазь «списьком».


Васстоматнень мееле ушодынек пресс кортамопромксонть (конференциянть) анокстамонзо. Кортынек журналистнэнь марто, сёрмадынек яволявтомат колмо (мадьяронь, рузонь ды англань) кельсэ . Эзинек редяяк, кода вейкенть таки лутызе. Савсь Эрюшнэнь кадомс делегаттнэнь марто кортамотнень ды стямс яволявтомань ванстыцякс.
Учомс савсь аволь кувать. Яволявтоматнень малав чийсть кавто мокшонь делегатт: - Анастасия Петербургская ды Анатолий Чушкин. Рузонь кельсэ ёвтызь вейке вейкенень апаро мелест минек яволявтоматнень кувалт. Валтнэ поладовсть тевсэ. Анастасия вентизе кедезэ яволявтомантень, ансяк ульнесь лоткавтозь Эрюшонь валтнэсэ: -«Те тон мезе теят? Аволь тон понгавтык, аволь тонеть лутамскак». Теде мееле рузонь кельсэ Эрюш ульнесь кевкстезь: -« Я делегат, а кто ты такой? , а почему вы порядок нарушаете?», ды: - «почему Вы говорите со мной на эрзянском»? Тень лангс сынест ульнесь ёвтазь мельга сёрмадозесь: - Мы делегаты, нас прислали сюда эрзяне, порядок мы не нарушаем. А что касается обращения на эрзянском, то это же вы, мордва, утверждаете, что мокшанский и эрзянский языки мало отличаются один от другого, значит, Вы должны меня понимать».
Истят валтнэде мееле, Чушкин чиновникесь (отдел связей с общественными организациями) алтась миненек: -«разобраться с нами», ды чиезь тусь анокстамо куронть (организационный комитет) ёнов. Ансяк тосо, чарькодинек, учось эйсэнзэ, «мордвакс» меремс «облом». Минек, отэльсэ эрицятнень, кияк тестэ панеме эзь пурнаво. Паряк цёрась стувтсь, тевесь юты аволь Саран ошсо.
Зярдо минь кепединек эрзянь колмо тюссо коцтонть перьканок пурнавсть сатышка ломанть телекамера ды микрофон марто. Кевкстематнеде ульнесть пек ламо, ансяк кенерть венькстнемс лангозост. Натой Мордовиясто оператороськак, конантень васняяк улнесь ёвтазь : -«Этих не снимать», сеяк ушодызе важодеманзо. Нама весе а ёвтневи, пек ламот кевкстицятнеде невтизь алкуксонь ачарькодемаст мекс миненек а максыть аволь ансяк делегатонь, ды ванныцянь статускак. Тень кувалт миненек кодаяк а понгомс секциясо кортамотнес. Паряк эрзянь меленть а бажить содамо аволь ансяк «мордватнень» прявттнэ, ды анокстамокуроськак.
Секс, пресс-кортамопромкстонть мееле, кавто чить минь кортынек эрьва косто делегаттнэнь марто. Ёвтнинек эрзянь тевтнеде, кевкстнинек кода эрить лия раськетне. Ламот янксесть: нилеце Инекужось Эстэнь масторсо ульнесь анокстазь ламоксть седе парсте. Тосо седе ламо кортасть эсь кельсэ. Бути истя карми молеме седе тов, кодамо смустесь истят пурнавкстнэсэ? Ярмакт ды шка ютавтомс? Паряк эряви арсемс эсенек Раськеютконь инекужодонть. Алкуксонь Раськеютконь. Косо мельспрыцятне аволь кирдивиень чиновниктне, косо гайги ды маряви эрьва раськенть вайгелезэ, улезэ те покшт: - финэнь, мадьяронь эли вишкат: людикень, саамонь раськетне.
Сыргинек отельстэ истя кода сынек - пиже вене. Ушосонть, келей кенкшенть икеле лоткась такси, кона ускинзе такосто кавто Инекужонь делегаттнэнь. Цёрась ветитянть вакссо, мазый мизолдыця авась удалце озамотаркасонть. Нолдазь сляника марто вальманть пачк марявсь:-« Вот 50 евро, тебе хватит?» -«Спасибо», кенярдозь венькстясь таксистэсь… Вана, арсезевинь, кода важодить делегаттнэ, ветькак арась тенест шка оймсемс.
Колмо часонь ютазь, менельвенчесь кепедсь эйсэнек верев, чинть каршо. Пельтне кадовсть ало. Менелесь ашолгадсь ды сась кемема: весе ули парсте Эрзянь Раськенть. Весе юты ды кадовить удало эрьва кодат тамашатне, ды ушодови эрямось виев Россиясонть конасонть эрьва раськесь виев кода лиятне, мельвановикс кода лиятне ды весе раськетнень вейкеть мельтопавтомаст. Истя ули!"

Боляень Сыресь.
2012 иень кавксоце таштамковонь чись, Шиофок –Буда-Пешт-Вена-Киев.